«Атлетико» дарвозабони Хуан Муссонинг фикрича, Николас Гонсалес майдондан четлатилгунига қадар мадридликлар «Барселона»дан (1:1) устунлик қилишаётган эди.

«Биз биринчи бўлимни аъло даражада ўтказдик. Рақибдан яхшироқ ўйнадик, бу томошабоп ва қизиқарли учрашув бўлаётганди. Қизил карточка биз учун жазо бўлди. Бир киши кам бўлиб ўйнаш жуда қийин.

Шунингдек, рақиб футболчисига ҳам қизил карточка берилиши керак эди, деб ҳисоблайман. Майдондаги ҳакам буни кўрганди. Ўша четлатиш ўйинни тенглаштирган бўларди. Майли, нима бўлганда ҳам олдинга интилишда давом этишимиз керак.

Бу мағлубият бизни ўзимизга бўлган ишончдан маҳрум қилмайди. Ўн бир га ўн бир ҳолатда биз яхшироқ эдик, деб ҳисоблайман. Бу бизга қўшимча куч бағишлайди», – деди Муссо.