«Ливерпуль»нинг афсонавий ҳимоячиси Жейми Каррагер кўплаб мухлисларнинг Арне Слотни истеъфога чиқариш истагига муносабат билдирди. Англия Кубоги чорак финалида «Манчестер Сити»дан учралган мағлубиятдан (0:4) сўнг бу мавзудаги баҳс-мунозаралар янада авж олди.
«Ливерпуль» мухлислари худди Фергюсон кетганидан кейинги «МЮ» мухлисларидек тутаётгани мени қўрқитмоқда. Улар кейинги Клоппни ёки шу даражадаги харизматик етакчини топишни шунчалик хоҳлашмоқдаки, ҳар мавсум яхши мураббийларни ишдан бўшатишга тайёрлар. Бошқа Клопп йўқ. У ягона эди», — дея Каррагернинг сўзларини келтиради The Telegraph.
«Ливерпуль» айни дамда АПЛда 31 турдан сўнг 49 очко билан бешинчи ўринни эгаллаб турибди. Чемпионлар лигаси чорак финалида Слот шогирдлари «ПСЖ» билан тўқнаш келишади.
