Якшанба куни Англия Кубоги ярим финалининг сўнгги йўлланмаси учун «Вест Хэм» ва «Лидс» жамоалари баҳс олиб боришди. «Товуслар» иккинчи бўлимга қўшиб берилган вақтда икки тўплик устунликни қўлдан чиқаришга йўл қўйишди. Шунга қарамай, «Лидс» барибир ғалаба қозонди – пенальтилар сериясида.

«Лидс» Англия Кубоги ярим финалчисига айланди ва энди «Уэмбли»да ўйнайди. Маълумки, турнирнинг ярим финал ва финал босқичлари мамлакатнинг бош аренасида ўтказилади. Таъкидлаш жоизки, «Лидс» охирги марта миллий кубокнинг ярим финалида узоқ 1987 йилда иштирок этган эди.

Қайд этиш лозим, Англия Кубоги ярим финалида «Лидс»га «Челси» рақиблик қилади. «Товуслар» навбатдаги сенсацияни қайд этишга ҳаракат қилишади.