«Интер» клубининг собиқ ҳужумчиси Юрген Клинсманн Италия терма жамоасининг ЖЧ-2026 йўлланмасидан қуруқ қолгани ҳақида ўз фикрларини билдирди.
Женнаро Гаттузо бошқарган жамоа жаҳон чемпионати саралашининг плей-офф финалида Босния ва Герцеговина терма жамоасига имкониятни бой берди (1:1, пенальтилар сериясида 1:4).
«Мен Лос-Анжелесдаги италиялик дўстларим билан бирга жуда қаттиқ ташвишландим. Ўша кеча ухлай олмадим.
Италия ҳозирда етакчиларнинг йўқлиги, рақибни бирга-бир вазиятда алдаб ўта оладиган футболчилар етишмаслиги ҳамда ёшларга нисбатан ишонч пастлиги учун товон тўламоқда. Масалан, сизларда Ямал ва Мусиала каби иқтидорларни, катта эҳтимол билан, тажриба орттириш учун Б Серияга юборган бўлишарди.
Бундан ташқари, кўплаб мураббийлар ҳали ҳам ҳар қандай ҳолатда ғалаба қозониш учун эмас, балки мағлуб бўлмаслик кўрсатмаси билан ишлашмоқда. Натижа эса кўз ўнгингизда», — деди Клинсманн Rai Sport эфирида.
