«Атлетико» бош директори Мигель Анхель Хиль Испания Ла Лигаси 30-туридан ўрин олган жамоалар ўртасидаги учрашувда (1:2) «Барселона» ҳимоячиси Жерар Мартинга кўрсатилган қизил карточканинг бекор қилинишини кескин танқид қилди.

«Ушбу кадрларни кўрганимизда ва федерация эълон қилаётган аудиоёзувларни тинглаганимизда, бу фақат уят туйғусини уйғотади. Ҳакамлар ҳам худди ўйинчилар, мураббийлар ва раҳбарлар каби ўйин пайтида хато қилиш ҳуқуқига эга, аммо майдондаги хатолар — бу шунчаки хатолар. VAR ҳаками бош ҳакам вазиятга баҳо бериб бўлганидан кейин унинг қарорига таъсир ўтказиши эса бошқа масала. VAR фақат шубҳасиз хатоларни тузатиш учун аралашиши керак, бош ҳакам ўрнига қарор қабул қилиши керак эмас.

Бир хил вазиятларда турлича қарорлар қабул қилиниши, мезонларнинг ўзгариб туриши ва биз нимага таянишни тушунмаётганимиз нормал ҳолат эмас. Бу охирги икки турда биз билан содир бўлди. Бунда мантиқ йўқ», — дея Хильнинг сўзларини келтирмоқда Marca.

Учрашувнинг 46-дақиқасида каталонияликлар ҳимоячиси тўпни эгаллаб олишга ҳаракат қилаётганда, «Атлетико» ярим ҳимоячиси Тьяго Альмаданинг оёғига бутсасининг тишлари билан зарба берган эди. Ҳакам Матео Бускетс Феррер VAR’ни кўргандан сўнг, футболчи бундан олдин тўп билан ўйнаган деб топди ва аввалроқ кўрсатилган қизил карточкани бекор қилди. Кейинчалик ҳакам ва VAR ўртасидаги ушбу қарор бўйича суҳбатлар эълон қилинди.