«Манчестер Сити» 1973 йилдан бери илк бор Англия Кубоги доирасида «Ливерпуль»ни мағлуб этди. «Шаҳарликлар» ушбу турнирда 1988, 2001, 2003 ва 2022 йилларда «қизиллар»га имкониятни бой беришган эди.

Шанба куни, 4 апрель куни Англия Кубоги 1/4 финалидан ўрин олган «Манчестер Сити» ва «Ливерпуль» жамоалари ўртасидаги учрашув бўлиб ўтди. Баҳс Манчестердаги «Этихад» стадионида ўтказилди. Бош ҳакам сифатида Майкл Оливер (Ашингтон, Англия) ишлади. Ўйин майдон эгаларининг 4:0 ҳисобидаги ғалабаси билан якунланди.

Мусобақанинг аввалги босқичида «Манчестер Сити» «Ньюкасл Юнайтед» устидан ғалаба қозонган бўлса, «Ливерпуль» «Вулверхэмптон»ни мағлуб этган эди. Турнирнинг амалдаги ғолиби финалда «Манчестер Сити»дан (1:0) устун келган «Кристал Пэлас» жамоаси ҳисобланади.