АПЛ клублари титул ҳомийси сифатида букмекерлик компанияларидан воз кечиш туфайли ўн миллионлаб фунт стерлинг йўқотишади.

2026/27 йилги мавсумдан бошлаб АПЛ клубларига букмекерлик идораси ёки казинони титул ҳомийси сифатида рўйхатдан ўтказиш тақиқланади. Ушбу тақиқ гемблинг (қимор) компанияларининг рекламасини форма енгларида, шортиларда, майдон атрофидаги баннерларда, стадион экранларида, шунингдек, ТВ-рекламаларда кўрсатишга дахл қилмайди.

Ҳозирги вақтда Англия чемпионатининг 11 та вакили — "Астон Вилла", "Борнмут", "Брентфорд", "Бёрнли", "Кристал Пэлас", "Эвертон", "Фулхэм", "Ноттингем Форест", "Сандерленд", "Вест Хэм" ва "Вулверхэмптон" букмекерлик компаниялари билан титул ҳомийлиги бўйича шартномага эга.

Шу билан бирга, ҳозиргача фақат "Борнмут", "Брентфорд", "Эвертон" ва "Фулхэм" кейинги мавсум учун янги титул ҳомийларини топишга улгурган. Қолган 7 та жамоа эса ҳали янги ҳомий топганича йўқ.

АПЛ клубларидан бирининг вакили The Guardian нашрига маълум қилишича, келаси мавсумда букмекерлик ҳомийларидан воз кечиш оқибатидаги умумий йўқотишлар 80 миллион фунт стерлинггача етиши мумкин.

Мақолада қайд этилишича, қимор компанияларининг бозорни тарк этиши "катта олтилик" ва АПЛнинг қолган клублари ўртасидаги ҳомийларни жалб қилиш борасидаги "шундоқ ҳам улкан бўлган фарқни янада кенгайтириб юборди".