APL klublari titul homiysi sifatida bukmekerlik kompaniyalaridan voz kechish tufayli o‘n millionlab funt sterling yo‘qotishadi.

2026/27 yilgi mavsumdan boshlab APL klublariga bukmekerlik idorasi yoki kazinoni titul homiysi sifatida ro‘yxatdan o‘tkazish taqiqlanadi. Ushbu taqiq gembling (qimor) kompaniyalarining reklamasini forma yenglarida, shortilarda, maydon atrofidagi bannerlarda, stadion ekranlarida, shuningdek, TV-reklamalarda ko‘rsatishga daxl qilmaydi.

Hozirgi vaqtda Angliya chempionatining 11 ta vakili — "Aston Villa", "Bornmut", "Brentford", "Byornli", "Kristal Pelas", "Everton", "Fulxem", "Nottingem Forest", "Sanderlend", "Vest Xem" va "Vulverxempton" bukmekerlik kompaniyalari bilan titul homiyligi bo‘yicha shartnomaga ega.

Shu bilan birga, hozirgacha faqat "Bornmut", "Brentford", "Everton" va "Fulxem" keyingi mavsum uchun yangi titul homiylarini topishga ulgurgan. Qolgan 7 ta jamoa esa hali yangi homiy topganicha yo‘q.

APL klublaridan birining vakili The Guardian nashriga ma’lum qilishicha, kelasi mavsumda bukmekerlik homiylaridan voz kechish oqibatidagi umumiy yo‘qotishlar 80 million funt sterlinggacha yetishi mumkin.

Maqolada qayd etilishicha, qimor kompaniyalarining bozorni tark etishi "katta oltilik" va APLning qolgan klublari o‘rtasidagi homiylarni jalb qilish borasidagi "shundoq ham ulkan bo‘lgan farqni yanada kengaytirib yubordi".