«Милан» бош мураббийи Массимилиано Аллегри Италия чемпионатининг 31-турида «Наполи»га қарши кечган баҳсдаги (0:1) мағлубиятдан сўнг ўз фикрларини билдирди.

«Бу ўйинда голли вазиятлар кам бўлди, шунинг учун биргина эпизод ҳамма нарсани ўзгартириб юбориши мумкинлигини билардик. «Наполи» ўз имкониятидан унумли фойдаланди. Ҳимоямиз ўз ўрнида эди, аммо барибир гол ўтказиб юбордик. Иккинчи бўлимда ҳужумларни тезроқ якунлашимиз керак эди, лекин биз сусткашликка йўл қўйдик ва уларга прессинг қилиш имконини бердик.

Менимча, Нкунку ва Фюллькруг яхши ўйин ўтказишди. Нкунку жамоа учун ишлади, унда бир нечта имкониятлар бўлди. Унга ўхшаган футболчилар ҳеч бўлмаганда битта вазиятни голга айлантириши лозим эди.

Рақиб ярим майдонида уч ёки тўрт марта тўпни олиб қўйдик, бироқ аниқ бўлмаган паслар бердик — бундай вазиятларда аниқлик жуда муҳим. Ўйинимизни албатта яхшилашимиз зарур. Асосий мақсадимиз бўлган Чемпионлар Лигасига йўлланма олиш учун ҳали анча меҳнат қилишимиз керак», — дея Аллегрининг сўзларини келтирмоқда Football Italia.

Ушбу учрашувдан сўнг «Наполи» 31 турдан кейин 65 очко билан турнир жадвалида иккинчи ўринга кўтарилиб олди. «Милан» эса 63 очко билан учинчи поғонада бормоқда.