«Milan» bosh murabbiyi Massimiliano Allegri Italiya chempionatining 31-turida «Napoli»ga qarshi kechgan bahsdagi (0:1) mag‘lubiyatdan so‘ng o‘z fikrlarini bildirdi.

«Bu o‘yinda golli vaziyatlar kam bo‘ldi, shuning uchun birgina epizod hamma narsani o‘zgartirib yuborishi mumkinligini bilardik. «Napoli» o‘z imkoniyatidan unumli foydalandi. Himoyamiz o‘z o‘rnida edi, ammo baribir gol o‘tkazib yubordik. Ikkinchi bo‘limda hujumlarni tezroq yakunlashimiz kerak edi, lekin biz sustkashlikka yo‘l qo‘ydik va ularga pressing qilish imkonini berdik.

Menimcha, Nkunku va Fyullkrug yaxshi o‘yin o‘tkazishdi. Nkunku jamoa uchun ishladi, unda bir nechta imkoniyatlar bo‘ldi. Unga o‘xshagan futbolchilar hech bo‘lmaganda bitta vaziyatni golga aylantirishi lozim edi.

Raqib yarim maydonida uch yoki to‘rt marta to‘pni olib qo‘ydik, biroq aniq bo‘lmagan paslar berdik — bunday vaziyatlarda aniqlik juda muhim. O‘yinimizni albatta yaxshilashimiz zarur. Asosiy maqsadimiz bo‘lgan Chempionlar Ligasiga yo‘llanma olish uchun hali ancha mehnat qilishimiz kerak», — deya Allegrining so‘zlarini keltirmoqda Football Italia.

Ushbu uchrashuvdan so‘ng «Napoli» 31 turdan keyin 65 ochko bilan turnir jadvalida ikkinchi o‘ringa ko‘tarilib oldi. «Milan» esa 63 ochko bilan uchinchi pog‘onada bormoqda.