Ҳужумчи Ферран Торрес катта эҳтимол билан шу ёзда "Барселона"ни тарк этади. ElNacional.cat маълумотларига кўра, Каталония клуби ҳужумчига жорий мавсум якунида сотилиши ҳақида расман маълум қилган.
Футболчи "кўк-анорранглилар" лойиҳаси режаларига кирмайди. Бу Торреснинг жорий йилдаги маҳсулдорлиги пасайгани билан боғлиқ. Ҳужумчи билан шартнома имзолашга "Ньюкасл", "Астон Вилла" ва "Тоттенхэм" клублари қизиқиш билдирмоқда. "Барселона" Торреснинг сотувидан 35 миллион евро ишлаб олмоқчи.
Жорий мавсумда Ферран Торрес "Барселона" сафида 41 та ўйин ўтказиб, 16 та гол урди ва битта голли узатмани амалга оширди. Унинг Каталония клуби билан шартномаси 2027 йил 30 июнгача амал қилади.
