Англиянинг «Арсенал» клуби дарвозабони Давид Райя Чемпионлар Лигаси 1/4 финали биринчи ўйинида Португалиянинг «Спортинг» жамоаси устидан қозонилган ғалаба (1:0) ҳақида фикр билдирди.

«Доим жамоамга максимал даражада ёрдам беришга ҳаракат қиламан. Бугун ҳам мен учун, ҳам бутун жамоа учун яхши кун бўлди. Биз сўнгги дақиқада гол урдик. Иккала жамоа ҳам ўйнашни хоҳлаган жуда қийин баҳс бўлди. Шу сабабли тўпни назорат қилиш мушкул кечди. Улар ҳаётимизни анчагина қийинлаштиришди.

Ўйиннинг боришига ва якуний натижага катта таъсир кўрсатадиган бундай лаҳзаларга эга бўлиш жуда муҳим. Бугун ғалаба қозониш ва жавоб ўйини олдидан устунликка эга бўлиш аҳамиятли эди. Гарчи иккинчи баҳсда ҳам қийин бўлса-да.

Уларда яхши жамоа бор. Бугун бу яққол кўринди. Уларга қарши ўйнаш мураккаб, улар жуда яхши футбол намойиш этишади ва йўқ жойдан вазият ярата олишади. Хавф уларнинг стандарт вазиятларидан ҳам келиб чиқади, шунинг учун ҳамма нарсага тайёр туришимиз керак», — дея Райянинг сўзларини УЕФА расмий сайти келтирмоқда.