«Атлетико» 2006 йилдан бери илк бор «Камп Ноу»да «Барселона»ни мағлуб этди. Диего Симеоне шогирдлари Чемпионлар лигаси чорак финалининг дастлабки учрашувида меҳмонда «блауграна» устидан ғалаба қозонишди (2:0).
Бу мадридликларнинг каталонияликлар уй стадионидаги сўнгги 26 та ўйинда қўлга киритган илк ғалабасидир. Таъкидлаш жоизки, 2024 йилда «Атлетико» Ла Лига доирасида сафарда «Барса»ни мағлуб этган (2:1), бироқ ўша ўйин «Монжуик» стадионида бўлиб ўтган эди.
Охирги марта мадридликлар 2006 йилнинг 5 февралида Испания чемпионати доирасида меҳмонда 3:1 ҳисобида зафар қучишган, ўшанда Фернандо Торрес дубль қайд этган эди.
