"Ливерпуль" устози Арне Слот Чемпионлар лигаси чорак финали доирасидаги "ПСЖ"га қарши кечган илк ўйиндаги (0:2) ҳимоявий тактикаси ҳақида фикр билдирди.

"Қизиллар" асосий эътиборни ҳимояга қаратишди, бунинг натижасида ҳужумдаги ўйин ишончсиз чиқди — дарвоза томон атиги 3 та зарба ва 26% тўп назорати қайд этилди.

"Сиз бирор жамоанинг Парижга келиб, "ПСЖ"га кетма-кет вазиятлар яратишга йўл қўймаганини кўрганмисиз? Мен кўплаб ўйинларни кўриб чиқдим ва барчасида бир хил манзара — тахминан бугунгидек ҳолат кузатилган. Улар шунчаки барча рақибларидан устун келишмоқда. Биз хулоса чиқаришимиз ва "Энфилд"да бошқачароқ ўйнаш имконини берадиган режа ишлаб чиқишимиз керак. Аниқки, у ерда тактикамиз бугунгидан бутунлай фарқ қилади, гарчи менинг фикримча, бу вазиятда гап тактикада эмас эди. "ПСЖ" ўз уйида ҳар қандай рақибни, у қандай услубда ўйнашидан қатъи назар, "супуриб" ташлайди", – дея журналистлар билан суҳбатда баён қилди Слот.