Италиянинг «Милан» клуби аллақачон ўзининг ёзги режаларини тузиб чиқмоқда — The Athletic нашрининг аниқлик киритишича, ёзда клуб «Манчестер Юнайтед»га қарши ўртоқлик учрашувида майдонга тушади. Ушбу баҳс Польша заминида бўлиб ўтади, ўйин санаси ҳам маълум — 15 август, яъни Англия ва Италия миллий чемпионатлари бошланиши арафасида.

Шунингдек, италияликлар ёз учун Австралия бўйлаб турне ҳам режалаштиришган — уларда ушбу олис мамлакатга нисбатан ўзгача иштиёқ борлигини ўтган февраль ойида Италия чемпионатининг бир учрашувини ўша ерда ўтказишга бўлган уринишлардан ҳам билиш мумкин.

Эслатиб ўтамиз, ҳозирда «Милан» Массимилиано Аллегри қўл остида Италия А Серияси турнир жадвалида учинчи ўринни эгаллаб турибди.