«Ал-Аҳли» ҳужумчиси Айвен Тоуни Саудия Арабистони чемпионати 29-тури доирасидаги «Ал-Файҳа»га қарши ўйиндан (1:1) сўнг ҳакамликдан қаттиқ норози бўлди.

Ўйин давомида «Ал-Аҳли» фойдасига учта пенальти белгиланмади. Журналист Бен Жейкобснинг ёзишича, Тоуни қарорлар «Ан-Наср»га турнирда ғолиб чиқишга ёрдам бериш учун уларнинг фойдасига чиқарилмоқда деб ҳисоблайди.

«Ҳал қилувчи паллаларда бундай нарсаларни қандай қилиб эътибордан четда қолдириш ёки уларга кўз юмиш мумкинлигига ишониш қийин. Бу ерда қандайдир таъсир борлиги кўриниб турибди.

Ҳакам ВАРни кўраётган пайтда бизга бошқа турнирга эътибор қаратишни айтиши — бу умуман ақлга сиғмайдиган ҳолат.

Ҳақиқатни айтганим ва шубҳали қарорлар ёки расво ҳакамликни кўрсатиб берганим учун, эҳтимол, мени «ёмон йигит» деб ҳисоблашар.

Кейинги сафар, агар керак бўлса, ўз маҳалламдан футболдан умуман хабари йўқ бирор кишини таклиф қилишим мумкин ва у бу ишни анави «клоунлар»дан кўра анча яхшироқ уддалайди», — деди Айвен Тоуни.

Ҳозирда «Ан-Наср» 27 ўйинда 70 очко жамғариб, турнир жадвалида пешқадамлик қилмоқда. Иккинчи ўринда «Ал-Ҳилол» (28 ўйинда 68 очко), учинчи ўринда эса «Ал-Аҳли» (28 ўйинда 66 очко) бормоқда.