«Лестер» клуби молиявий қоидабузарликлар сабабли Чемпионшипда жамоадан олти очко олиб ташланиши борасидаги қарор устидан қилган апелляциясида ютқазди, деб хабар бермоқда BBC.
Аввалроқ, февраль ойида «тулкилар» 2023/2024 йилги мавсум билан якунланган уч йиллик давр учун рухсат этилган максимал зарар миқдоридан ошиб кетгани ва молиявий ҳисоботларни кечиктириб топширгани учун айбдор деб топилиб, улардан олти очко олиб ташлангани ҳақида хабар берилган эди.
«Лестер» молиявий фэйр-плей қоидаларини бузгани учун берилган бу жазони ўта қаттиқ деб ҳисоблаб, апелляция берган эди. Бироқ Англия Премьер-лигаси бунга жавобан қарши даъво киритиб, аксинча, ушбу ҳукмни ўта юмшоқ деб топди.
Натижада, мустақил комиссия олти очкони олиб ташлаш ҳақидаги қарорни ўз кучида қолдирди — шу тариқа, «Лестер» Чемпионшип турнир жадвалида охиридан учинчи ўринда қолди.
Клуб барча мусобақалардаги охирги 12 ўйинидан фақат биттасида ғалаба қозонди ва кетма-кет иккинчи мавсумда пастки лигага тушиб кетиш хавфи остида турибди.
