«Lester» klubi moliyaviy qoidabuzarliklar sababli Chempionshipda jamoadan olti ochko olib tashlanishi borasidagi qaror ustidan qilgan apellyasiyasida yutqazdi, deb xabar bermoqda BBC.

Avvalroq, fevral oyida «tulkilar» 2023/2024 yilgi mavsum bilan yakunlangan uch yillik davr uchun ruxsat etilgan maksimal zarar miqdoridan oshib ketgani va moliyaviy hisobotlarni kechiktirib topshirgani uchun aybdor deb topilib, ulardan olti ochko olib tashlangani haqida xabar berilgan edi.

«Lester» moliyaviy feyr-pley qoidalarini buzgani uchun berilgan bu jazoni o‘ta qattiq deb hisoblab, apellyasiya bergan edi. Biroq Angliya Premyer-ligasi bunga javoban qarshi da’vo kiritib, aksincha, ushbu hukmni o‘ta yumshoq deb topdi.

Natijada, mustaqil komissiya olti ochkoni olib tashlash haqidagi qarorni o‘z kuchida qoldirdi — shu tariqa, «Lester» Chempionship turnir jadvalida oxiridan uchinchi o‘rinda qoldi.

Klub barcha musobaqalardagi oxirgi 12 o‘yinidan faqat bittasida g‘alaba qozondi va ketma-ket ikkinchi mavsumda pastki ligaga tushib ketish xavfi ostida turibdi.