Бугун Мадриднинг «Реал» клуби Ла Лига доирасида ўз майдонида «Жирона»ни қабул қилади. Учрашув Тошкент вақти билан 00:00 да бошланади.
Келаси чоршанба куни «қаймоқранглилар»ни «Бавария»га қарши чорак финалнинг жавоб баҳси кутмоқда, шу сабабли бош мураббий Альваро Арбелоа муҳим ўйинчилардан бири — Антонио Рюдигерга дам беради, деб хабар бермоқда журналист Хосе Луис Санчес. 33 ёшли марказий ҳимоячи Мюнхендаги жанг олдидан куч йиғиши учун жума кунги чемпионат баҳсида асосий таркибда майдонга тушмайди.
Эслатиб ўтамиз, қарама-қаршиликнинг дастлабки ўйинида «Реал» «Сантьяго Бернабеу»да «Бавария»га 1:2 ҳисобида имкониятни бой берган эди. Ушбу жуфтлик ғолиби ярим финалда «ПСЖ» ёки «Ливерпуль» жамоаларидан бири билан тўқнаш келади.
