«Барселона» чоршанба куни Чемпионлар лигаси чорак финалининг илк учрашувида ўз майдонида «Атлетико»га 0:2 ҳисобида имкониятни бой берди. Биринчи бўлим якунида Пау Кубарси майдондан четлатилгач, каталонияликлар бир киши кам бўлиб қолишди ва танаффусда Ханс-Дитер Флик ҳужумчи Роберт Левандовскини алмаштиришга мажбур бўлди.
Goal порталининг Испаниянинг «Sport» нашрига таяниб хабар беришича, Фликнинг ушбу қарори Левандовскини ранжитган. Польяк футболчиси иккинчи бўлимда жамоаси бир киши кам бўлиб ўйнаётган вазиятда ҳам ўйинга ижобий таъсир кўрсата олишига ишонган.
Шу билан бирга, Флик ва Левандовски ўртасида ўзаро ҳурмат сақланиб қолгани алоҳида таъкидланган.
«Барселона» навбатдаги учрашувини 11 апрель куни Ла Лига доирасида «Эспаньол»га қарши ўтказади.
