«Barselona» chorshanba kuni Chempionlar ligasi chorak finalining ilk uchrashuvida o‘z maydonida «Atletiko»ga 0:2 hisobida imkoniyatni boy berdi. Birinchi bo‘lim yakunida Pau Kubarsi maydondan chetlatilgach, kataloniyaliklar bir kishi kam bo‘lib qolishdi va tanaffusda Xans-Diter Flik hujumchi Robert Levandovskini almashtirishga majbur bo‘ldi.

Goal portalining Ispaniyaning «Sport» nashriga tayanib xabar berishicha, Flikning ushbu qarori Levandovskini ranjitgan. Polyak futbolchisi ikkinchi bo‘limda jamoasi bir kishi kam bo‘lib o‘ynayotgan vaziyatda ham o‘yinga ijobiy ta’sir ko‘rsata olishiga ishongan.

Shu bilan birga, Flik va Levandovski o‘rtasida o‘zaro hurmat saqlanib qolgani alohida ta’kidlangan.

«Barselona» navbatdagi uchrashuvini 11 aprel kuni La Liga doirasida «Espanyol»ga qarshi o‘tkazadi.