«Ливерпуль» бош мураббийи Арне Слот АПЛ доирасида «Фулхэм»га қарши ўйин олдидан ўтказилган матбуот анжуманида клуб раҳбарияти томонидан бўлаётган ишонч ҳақида гапириб ўтди.

8 апрель куни мерсисайдликлар Чемпионлар Лигаси чорак финалининг илк баҳсида «ПСЖ»га (0:2) имкониятни бой беришган эди.

«Буни тез-тез такрорлаб тураман, лекин мен катта қўллаб-қувватлашни ҳис қиляпман. Нафақат эгаларимиздан, балки Ричард Хьюз ва Майкл Эдвардс томонидан ҳам кучли дастак бор.

Қанчалик ғалати эшитилмасин, мухлисларнинг далдасини ҳам сезиб турибман. «Манчестер Сити»дан учралган 0:4 ҳисобидаги мағлубиятдан кейин ҳам мухлислар «Биз «Ливерпуль»ни севамиз» деб куйлашди. Тўғрисини айтсам, ўша ўйинда бизни 90 дақиқа давомида мағлуб этишди, лекин улар барибир қўшиқ айтишда ва бизни олқишлашда давом этишди.

Қандай вазиятда турганимизни тушуниб турибмиз ва шу билан бирга, мен тўлиқ қўллаб-қувватлашни ҳис қиляпман», — деди Арне Слот.