«Барселона» спорт директори Деку ҳужумчи Лионель Мессининг эҳтимолий қайтиши ҳақидаги хабарларга муносабат билдирди.
«Бу мураккаб савол. Сайловолди кампанияси вақтида бу масала узоқ муҳокама қилинди ва унинг исми доимий равишда тилга олинди. Месси — «Барселона» тарихидаги энг яхши футболчи, мен учун эса у футбол тарихидаги энг зўр ёки энг зўрлардан бири.
Биз футболнинг барча жабҳаларда абадий бўлишини истардик. Абадий давом этишини хоҳлайдиган нарсаларимиз кўп, аммо уларнинг ҳам якуни бор. Ҳар бир нарсанинг бошланиши, ривожланиши ва ниҳояси бўлади, шунинг учун бу мавзудаги шунчаки тахминлар мен учун маънога эга эмас.
Менинг келишимдан бери [2023 йилдан] [Мессининг] қайтиш имконияти ҳеч қачон муҳокама қилинмаган. На Месси ва на унинг вакилларидан бирортаси менга қўнғироқ қилиб: «Мен қайтмоқчиман, ўйнамоқчиман», деб айтмаган. Буларнинг барчаси шунчаки миш-мишлар ва ҳақиқатдан йироқ гаплар эди», — дея Декунинг сўзларини келтиради «Goal» нашри «Sport»га таяниб.
