Туриннинг "Ювентус" жамоаси бош мураббийи Лучано Спаллетти Италия Серия А 32-турида "Аталанта"га қарши (1:0) учрашув натижаси ҳақида фикр билдирди.

«Дастлабки 30 дақиқада жуда қийналдик, чунки «Аталанта» яхши жамоа ва улар доимий прессинг орқали бизга узатма бериш имконини бермади. Биз фақат ҳимояланишга мажбур бўлдик. Иккинчи бўлимда ўйин бутунлай ўзгарди, биз тенг ўйнадик. Одатда биз устунликдан фойдаланолмай, ҳисобда олдинда бўлиб туриб ҳам ютқазардик, бу сафар эса аксинча бўлди.

Бундай ўйинларда энг муҳими — уч очко. Афсуски, ўйин олдидан жамоа тўлиқ тайёр эмас эди: Кенан Йилдиз ва Франсишку Консейсауда соғлиқ билан боғлиқ муаммолар бор эди. Мен уларни асосий таркибда тушириб, ҳолатини кўрмоқчи бўлдим. Иккаласи ҳам тўлиқ формада эмас эди, Кефрен Тюрам-Юльенда ҳам муаммолар борди.

Биринчи бўлимда ҳам хатолар қилдик, хусусан, Консейсауга қанотда рақибни яккама-якка ҳолатда ўтиб кетиш имконини бермадик — бу унинг кучли жиҳати. Кейин айрим ўзгартишлар киритдик ва иккинчи бўлим бутунлай бошқача кечди.

Италия Кубоги ўйинидаги («Ювентус» 0:3 ҳисобида ютқазган) хатоларимиз биз учун жуда қимматга тушганди. Бугун эса рақиб қанотдан қанотга ўйнаб, ҳимоямизни ёйишга ҳаракат қилди ва бизни орқага чекинишга мажбур этди. Биз эса позициямизни сақлаб қола олмадик. Бу бизнинг заиф томонимиз — айрим пайтларда ҳимоя чизиғимиз жуда орқага чекиниб кетади», — деди Спаллетти.

Ҳозирги ҳолатга кўра, «Аталанта» 32 ўйиндан сўнг 53 очко билан 7-ўринда бормоқда. «Ювентус» эса 60 очко билан 4-ўринни эгаллаб турибди.