«Барселона» бош мураббийи Ханс-Дитер Флик ярим ҳимоячи Френки де Йонгнинг ҳолати ҳақидаги саволга жавоб берди. Шанба куни «Эспаньол»га қарши кечган баҳсда нидерландиялик футболчи захирадан майдонга тушиб, голли узатмани амалга оширди. Бу де Йонг учун 22 февралдан бери ўтказилган илк ўйин бўлди.
«Де Йонгнинг қайтиши? У майдонга тушгач, ўз даражасини кўрсата олди. Бироқ унинг «Атлетико»га қарши учрашувда асосий таркибда майдонга тушишига ишончим комил эмас. Унинг 45 дақиқадан кўпроқ ўйнай олишини билмайман. Бу борада тиббий штаб билан маслаҳатлашаман», — дея Фликнинг сўзларидан иқтибос келтиради The Touchline.
«Барселона» келаётган сешанба, 14 апрель куни сафарда «Атлетико» меҳмони бўлади. Каталонияликлар Чемпионлар лигаси чорак финалининг дастлабки ўйинидаги 0:2 ҳисобидаги мағлубиятдан сўнг вазиятни ўнглашлари лозим.
