Италиянинг «Милан» клуби устози Массимилиано Аллегри ўз футболчиларини руҳлантириш йўлини топишига ишончи комил. Италияда кўпчилик футболчилар «Интер»га етиб олиш мумкинлигига бўлган ишончни йўқотгани сабабли бўшашиб қолган ва диққат-эътиборни йўқотган, деб ҳисобламоқда. Аллегри эса Чемпионлар лигасига йўлланма олиш ҳам жуда кучли ва зарур мотивация эканлигини таъкидлади.
«Тўғри, чемпионлик пойгасидан чиқиб кетиш мотивацияга салбий таъсир қилади, бу фикрга қўшиламан. Бироқ йигитлар бунга муносиб жавоб қайтаришига ва жонланишига ишонаман. Чемпионлар лигасида иштирок этиш — бу ҳам катта мотивация. Ҳозир эса бу мақсад хавф остида турибди», — дея мутахассиснинг сўзларидан иқтибос келтиради derbyderbyderby.it.
Эслатиб ўтамиз, «Милан» охирги марта 2022 йилда Италия чемпиони бўлган эди. Ўтган мавсумни эса клуб атиги саккизинчи ўринда якунлаган.
