«Бавария» дарвозабони Мануэль Нойер Германия терма жамоаси бош мураббийи Юлиан Нагельсманн туфайли Жаҳон чемпионати учун миллий жамоага қайтишдан бош тортаётгани ҳақидаги миш-мишларга изоҳ берди.

«Бу шунчаки ҳақиқатга тўғри келмайди. Биз «Бавария»да бирга ишлаганмиз; у менинг мураббийим эди. Европа чемпионатида ҳам мен унинг дарвозабони эдим. Муносабатларимиз ёмон эмас, аксинча, бизнинг алоқаларимиз яхши. Ташқарида айтилаётган гаплар уни ҳам, мени ҳам қизиқтирмайди. Шунинг учун биз бу борада хотиржаммиз.

Мен Жаҳон чемпионатига тайёргарлик жараёнида иштирок этмаяпман ва бу жараённинг бир қисми эмасман. Диққат-эътиборим «Бавария»га қаратилган ва буни бир неча бор таъкидлаганман. Мен шунчаки ушбу жамоанинг бир бўлаги эканлигимдан завқланяпман. Олдимизда кўплаб муҳим ва ҳал қилувчи ўйинлар турибди, мен жамоа билан биргаликда ушбу лаҳзалардан баҳра олишга ҳаракат қиляпман», — деди Нойер ZDF телеканалига берган интервьюсида.

Эслатиб ўтамиз, Юлиан Нагельсманннинг «Бавария»даги фаолияти давомида, 2023 йилда у ва Мануэль Нойер ўртасида келишмовчилик юзага келган эди. Бунга Нойернинг яқин дўсти бўлган дарвозабонлар мураббийи Тони Топаловичнинг ишдан бўшатилиши сабаб бўлганди.