«Бавария» Венсан Компани бошқарувида рекордларни янгилашда давом этмоқда. Бундеслиганинг «Санкт-Паули»га қарши кечган сўнгги учрашувида (5:0) мюнхенликлар сафида 18 ёшли Бара Ндиайе дебют қилди. Kicker нашрининг қайд этишича, у жорий чемпионатда жамоа сафида майдонга тушган 31-футболчи бўлди ва бу клубнинг янги рекорди ҳисобланади.

Бундан ташқари, «Бавария» бир мавсум давомида таркибга жалб этилган 19 ёш ва ундан кичик бўлган футболчилар сони бўйича ҳам Бундеслига рекордини ўрнатди — бундай ёш ўйинчилар сони 8 нафарга етди.

Эслатиб ўтамиз, айнан шу баҳсда Компани жамоаси Бундеслиганинг бир мавсумидаги умумий голлар сони бўйича ҳам рекордни янгилади (105 та гол). Ваҳоланки, чемпионат якунигача ҳали яна бешта тур мавжуд.