«Манчестер Сити»нинг ҳужумкор ярим ҳимоячиси Райан Шерки якшанба куни «Челси»га қарши кечган баҳснинг (3:0) асосий қаҳрамонларидан бирига айланди. Ушбу ўйинда француз футболчиси иккита голли узатмани амалга оширди.

51-дақиқада у Нико О’Райлига гол уришда кўмаклашган бўлса, 57-дақиқада унинг пасидан сўнг Марк Гехи рақиб дарвозасини ишғол қилди. Opta маълумотларига кўра, бу Шерки учун жорий мавсумдаги барча турнирлар доирасида икки ва ундан ортиқ ассист қайд этган тўртинчи ўйин бўлди — бу Премьер-лига вакиллари орасидаги энг яхши натижадир. «Шаҳарликлар»нинг 22 ёшли аъзоси бу кўрсаткич бўйича «Манчестер Юнайтед» сардори Бруну Фернандешдан (учта ўйин) ўзиб кетди.

Умумий ҳисобда, Райан Шерки жорий мавсумдаги 43 та учрашувда 13 та голли узатмани амалга оширди ва 9 бор рақиблар дарвозасини ишғол қилди.