Машҳур испаниялик журналист Эду Агирре «Реал Мадрид»нинг жорий мавсумдаги муаммолари ҳақида кескин фикр билдирди.

Ла Лиганинг 31-тури доирасида жума куни бўлиб ўтган баҳсда «Жирона» билан дуранг ўйнаган (1:1) «қаймоқранглилар» чемпионлик имкониятини деярли қўлдан чиқаришди. Айни дамда Мадрид грандининг турнир жадвалида пешқадамлик қилаётган «Барселона»дан орқада қолиши 9 очкони ташкил этмоқда.

"Реал" чемпионатда Европа Лигаси даражасидаги жамоадек ўйнамоқда. Йўқ, ҳатто Конференциялар Лигаси даражасида. Улар "Эльче", "Сельта", "Хетафе", "Мальорка" ва "Жирона"га қарши ўйинларда қоқилишди. Бу рақиб дарвозабони 15 та сейв ижро этган, "Реал" эса тўхтовсиз ҳужум қилган икки йил олдинги ҳолат эмас. Йўқ, бу ўйинларнинг барчасида 75-дақиқадаёқ жамоа ғалаба қозона олмаслиги маълум эди. Бундай бўлиши керак эмас. Ушбу "Реал" — жадвалнинг ўртамиёнаси, Конференциялар Лигаси даражаси", — дея Агирренинг сўзларини келтирмоқда Madrid Universal.

Эслатиб ўтамиз, 15 апрель куни Альваро Арбелоа шогирдлари Чемпионлар лигаси 1/4 финали доирасида «Бавария»га қарши жавоб учрашувини ўтказишади.