«Комо» жамоасининг испаниялик устози Франсеск Фабрегас март ойи якунларига кўра Италия чемпионатининг энг яхши мураббийи деб тан олинди. Бу ҳақда мусобақанинг расмий сайти хабар бермоқда.

38 ёшли мутахассис ўз жамоасини «Кальяри» (2:1), «Рома» (2:1) ва «Пиза» (5:0) устидан қозонилган учта муҳим ғалаба сари бошлаб келди. Бу натижалар «Комо»нинг турнир жадвалининг юқори қисмидаги позициясини мустаҳкамлашига ёрдам берди.

Мазкур соврин Фабрегасга «Комо»нинг Миланнинг «Интер» клубига қарши ўз майдонидаги ўйини олдидан топширилди. 12 апрель куни 32-тур доирасида бўлиб ўтган учрашув «нерадзуррилар»нинг 4:3 ҳисобидаги ғалабаси билан якунланди. Ҳозирда «Комо» 58 очко билан турнир жадвалида бешинчи ўринни эгаллаб турибди.