«Сандерленд» сардори Гранит Жака «Тоттенхэм»га қарши кечган баҳс якунлари ҳақида тўхталди. Англия чемпионатининг 32-тури доирасида бўлиб ўтган учрашув Режис Ле Брис шогирдларининг 1:0 ҳисобидаги ғалабаси билан якунланди.

«Деярли 4 ҳафталик танаффусдан сўнг ўз уйимизга қайтиш ва мухлисларга улар лойиқ бўлган натижани тақдим этиш жуда муҳим эди. Биз энг яхши ўйин кўрсатган жамоа бўлдик ва 3 очкога муносиб эдик», — дея Жаканинг сўзларидан иқтибос келтирмоқда Sky Sports.

«Менимча, мураббийини ўзгартирган жамоага қарши биринчи марта ўйнашимиз эмас. Биз Де Зербини яхши биламиз, у ўз жамоаларида тўп назоратини яхши кўради ва ғолиблик менталитетига эга, бироқ биз ажойиб ўйин кўрсатдик», — дея қўшимча қилди футболчи.

Айни дамда «Сандерленд» 46 очко билан ўнинчи ўринда бормоқда. «Тоттенхэм» эса 30 очко билан 19-ўринга, яъни хавфли ҳудудга (премьер-лигани тарк этиш зонасига) тушиб кетди.