«Sanderlend» sardori Granit Jaka «Tottenxem»ga qarshi kechgan bahs yakunlari haqida to‘xtaldi. Angliya chempionatining 32-turi doirasida bo‘lib o‘tgan uchrashuv Rejis Le Bris shogirdlarining 1:0 hisobidagi g‘alabasi bilan yakunlandi.

«Deyarli 4 haftalik tanaffusdan so‘ng o‘z uyimizga qaytish va muxlislarga ular loyiq bo‘lgan natijani taqdim etish juda muhim edi. Biz eng yaxshi o‘yin ko‘rsatgan jamoa bo‘ldik va 3 ochkoga munosib edik», — deya Jakaning so‘zlaridan iqtibos keltirmoqda Sky Sports.

«Menimcha, murabbiyini o‘zgartirgan jamoaga qarshi birinchi marta o‘ynashimiz emas. Biz De Zerbini yaxshi bilamiz, u o‘z jamoalarida to‘p nazoratini yaxshi ko‘radi va g‘oliblik mentalitetiga ega, biroq biz ajoyib o‘yin ko‘rsatdik», — deya qo‘shimcha qildi futbolchi.

Ayni damda «Sanderlend» 46 ochko bilan o‘ninchi o‘rinda bormoqda. «Tottenxem» esa 30 ochko bilan 19-o‘ringa, ya’ni xavfli hududga (premyer-ligani tark etish zonasiga) tushib ketdi.