Тошкент вилоятида жойлашган Миллий футбол марказида Марказий Осиё футбол ассоциациясига аъзо мамлакатларнинг ўсмирлар терма жамоалари иштирокида 2026 йилги CAFA U-17 Championship турнири ўтказилди.

Унда Айдер Курбаев бошқарувидаги Ўзбекистон U-16 терма жамоаси қатнашди ва якунда 2-ўринни эгаллади.

Мусобақада Эрон терма жамоаси иштирок этмагани сабабли Ўзбекистон, Тожикистон, Қирғиз Республикаси, Туркманистон ва Афғонистон бир гуруҳда ўзаро баҳс олиб борди.

Турнир 5 та турдан иборат бўлиб жамоалар 4 тадан учрашув ўтказди. 3 та ғалаба ва 1 та дуранг натижа қайд этган Тожикистон ўсмирлар терма жамоаси кетма-кет иккинчи бор CAFA турнири ғолиблигини қўлга киритди. 2 та ғалаба ва 2 та дурангга эга Ўзбекистон иккинчи, 1 та ғалаба, 1 та дуранг ва 2 та мағлубият қайд этган Қирғиз Республикаси 3-ўринни эгаллади.

Ўзбекистон терма жамоаси дарвозасини ишончли тарзда қўриқлаган Азиз Бердиев мусобақанинг энг яхши дарвозабони деб топилди.

Тожикистон терма жамоаси вакили Биҳишти Ражабзод энг яхши футболчи, 4 та гол киритишга муваффақ бўлган тожикистонлик ҳужумчи Сиёвуш Назаров эса энг яхши тўпурар сифатида эътироф этилди.

Турнирнинг “ҳалол ўйин учун” соврини Афғонистон терма жамоасига топширилди.

Маълумот учун, CAFA U-17 Championship мусобақаси 2027 йилдан бошлаб U-17 Осиё кубоги учун саралаш турнири вазифасини бажаради.

CAFA U-17 Championship, 5-тур
Ўзбекистон — Тожикистон 0:0
Қирғиз Республикаси — Туркманистон 4:1