Toshkent viloyatida joylashgan Milliy futbol markazida Markaziy Osiyo futbol assosiasiyasiga a’zo mamlakatlarning o‘smirlar terma jamoalari ishtirokida 2026 yilgi CAFA U-17 Championship turniri o‘tkazildi.
Unda Ayder Kurbayev boshqaruvidagi O‘zbekiston U-16 terma jamoasi qatnashdi va yakunda 2-o‘rinni egalladi.
Musobaqada Eron terma jamoasi ishtirok etmagani sababli O‘zbekiston, Tojikiston, Qirg‘iz Respublikasi, Turkmaniston va Afg‘oniston bir guruhda o‘zaro bahs olib bordi.
Turnir 5 ta turdan iborat bo‘lib jamoalar 4 tadan uchrashuv o‘tkazdi. 3 ta g‘alaba va 1 ta durang natija qayd etgan Tojikiston o‘smirlar terma jamoasi ketma-ket ikkinchi bor CAFA turniri g‘olibligini qo‘lga kiritdi. 2 ta g‘alaba va 2 ta durangga ega O‘zbekiston ikkinchi, 1 ta g‘alaba, 1 ta durang va 2 ta mag‘lubiyat qayd etgan Qirg‘iz Respublikasi 3-o‘rinni egalladi.
O‘zbekiston terma jamoasi darvozasini ishonchli tarzda qo‘riqlagan Aziz Berdiyev musobaqaning eng yaxshi darvozaboni deb topildi.
Tojikiston terma jamoasi vakili Bihishti Rajabzod eng yaxshi futbolchi, 4 ta gol kiritishga muvaffaq bo‘lgan tojikistonlik hujumchi Siyovush Nazarov esa eng yaxshi to‘purar sifatida e’tirof etildi.
Turnirning “halol o‘yin uchun” sovrini Afg‘oniston terma jamoasiga topshirildi.
Ma’lumot uchun, CAFA U-17 Championship musobaqasi 2027 yildan boshlab U-17 Osiyo kubogi uchun saralash turniri vazifasini bajaradi.
CAFA U-17 Championship, 5-tur
O‘zbekiston — Tojikiston 0:0
Qirg‘iz Respublikasi — Turkmaniston 4:1
