Бугун Испания Қироллик футбол федерацияси мамлакат кубоги финалидан ўрин олган «Атлетико» — «Реал Сосьедад» учрашувини бошқариб борадиган ҳакамлар бригадаси таркибини эълон қилди. Ушбу баҳс 18 апрель куни Севильяда бўлиб ўтади.

Бригада таркибидан саккиз нафар ҳакам жой олди: Хавьер Альберола Рохас (бош ҳакам), Альфредо Родригес (биринчи ёрдамчи), Хорхе Буэно (иккинчи ёрдамчи), Адриан Кордеро (захира ҳаками), Хосе Луис Мартинес (бешинчи ҳакам), Хорхе Фигероа Васкес (ВАР), Даниэль Трухильо Суарес (АВАР1) ва Луис Мария Милья (АВАР2).

Ҳакамлар қўмитасининг бу қарори турли эътирозларга сабаб бўлди. Гап шундаки, 10 апрель куни Альберола Рохас Испания чемпионати 31-туридан ўрин олган «Реал» — «Жирона» (1:1) ўйинини бошқарган, Трухильо Суарес эса ўша баҳсда ВАР ҳаками сифатида ишлаган эди. Ўша учрашувнинг 87-дақиқасида Килиан Мбаппега нисбатан ишлатилган яққол фол (унинг пешонаси ва лабига тирсак билан зарба берилган) учун бош ҳакам пенальти белгиламаган, видеоассистент эса вазиятга аралашмаган эди.