«Лидс» сафарда «Манчестер Юнайтед»ни 2:1 ҳисобида мағлуб этди. «Товуслар»га Лисандро Мартинеснинг четлатилиши ёрдам берди — аргентиналик ҳимоячи кураш вақтида Доминик Калверт-Льюиннинг сочидан тортиб юборган эди. Ўйиндан сўнг «Лидс» футболчиси ўз фикрларини билдирди.
«Бу биз учун улкан натижа. Биз бу ерга ғалаба қозониш учун келгандик ва ўзимизни шунга созлагандик. Режани бажардик ва уйга уч очко билан қайтмоқдамиз. Жуда хурсандмиз.
Мартинеснинг четлатилиши? Билмадим, қоидаларни мен ўрнатмайман. Сочимдан тортишганини ҳис қилдим ва бу ҳақда ҳакамга айтдим, қарор қабул қилиш эса унинг иши. Бу атайлаб қилиндими ёки йўқми, билмайман. Адоватим йўқ», — деди Калверт-Льюин Sky Sports нашрига.
«Манчестер Юнайтед» устидан қозонилган ғалабадан сўнг «Лидс» хавфли ҳудуддан (премьер-лигани тарк этиш зонаси) олти очкога узоқлашди.
