Туркиянинг “Сивасспор” футбол клуби академиясининг (13 ёшгача бўлган футболчилар) тўрт нафар аъзоси жамоанинг уй стадионига бориш йўлида йўл-транспорт ҳодисасига учради. Бу ҳақда клуб матбуот хизмати хабар берди.

Қайд этилишича, Сивас шаҳрида клуб қароргоҳига кириш арафасида бўлган такси қарама-қарши йўналишдан келаётган енгил автомобил билан тўқнашиб кетган. Ҳалокат оқибатида 6 киши, жумладан, “Сивасспор” У-13 жамоасининг 4 нафар футболчиси жароҳат олди. Зарба натижасида транспорт воситаларидан бирида ёнғин чиққан, оғир жароҳат олган ёш футболчи Бурак Шаҳиннинг аҳволи оғир.

Маълумотларга кўра, ёш футболчилар Туркия Биринчи лигаси доирасидаги “Истанбулспор”га қарши кечадиган уй учрашувида “болбой” сифатида иштирок этиши керак бўлган.

“Сивасспор” вакилларининг маълум қилишича, футболчилар айни дамда тиббий гуруҳ назорати остида. Ҳуқуқ-тартибот идоралари томонидан ЙТҲ юзасидан суриштирув ишлари олиб борилмоқда.

Маълумот учун, мамлакат Биринчи лигаси доирасида кечган баҳсда “Истанбулспор” 3:1 ҳисобида “Сивасспор”дан устун келди.

Ўзбекистон МТЖ футболчиси Азизбек Турғунбоев 2024 йил февралдан, 2025 йил июнь ойига қадар айнан “Сивасспор” сафида фаолият юритган. У 37 та учрашувда майдонга тушиб, 1 та гол ва 3 та голли узатмани амалга оширган.