Ижара асосида «Милан» сафида тўп сураётган германиялик ҳужумчи Никлас Фюллькруг Италия топ-клубида узоқ қолмайди. Бу ҳақда инсайдер Фабрицио Романо ижтимоий тармоқлар орқали хабар бермоқда.
Манбага маълум бўлишича, «россонерилар» 33 ёшли марказий ҳужумчининг тўлиқ трансфер ҳуқуқини 5 миллион евро эвазига сотиб олишга қизиқиш билдиришмаяпти. Фюллькругнинг амалдаги шартномаси Лондоннинг «Вест Хэм» клубига тегишли.
Италия А Сериясининг жорий мавсумида германиялик футболчи 16 та учрашувда майдонга тушди. Никлас ушбу ўйинларда бор-йўғи битта гол уришга муваффақ бўлган.
Мамлакат чемпионатининг 32 туридан сўнг «Милан» 63 очко билан турнир жадвалида учинчи ўринни эгаллаб турибди.
