«Интер» ҳимоячиси Алессандро Бастонининг «Барселона»га эҳтимолий ўтиши ҳақида янги маълумотлар пайдо бўлди.

Инсайдер Фабрицио Романонинг хабар беришича, сўнгги вақтларда Бастони билан боғлиқ келишув борасида ҳеч қандай ўзгариш кузатилмаган. Манбага кўра, яқин икки ҳафта ичида ҳам бу борада янгилик бўлиши кутилмаяпти.

Бироқ, каталонияликлар трансфер ойнаси очилишини кутмасдан, ўтишни май ёки июнь ойларида расмийлаштиришни режалаштиришмоқда. Шу билан бирга, «Барселона» Бастони билан декабрь ойидан бери алоқада бўлиб тургани таъкидланмоқда.

Жорий мавсумда 27 ёшли италиялик ҳимоячи барча турнирларда 37 та ўйинда майдонга тушиб, 2 та гол урди ва 6 та голли узатмага муаллифлик қилди. Гранд клублар ўртасидаги бу трансфер мавсумнинг энг йирик келишувларидан бири бўлиши кутилмоқда.