«Наполи» ҳужумчиси Ромелу Лукаку бош мураббий Антонио Конте билан учрашувдан сўнг жамоанинг мавсум учун қайдномасидан чиқариб юборилиши мумкин. Клуб футболчини ёзги трансфер ойнасида сотишни режалаштирмоқда, деб хабар беради L’Équipe.

Ҳозирда Бельгияда сон жароҳатидан сўнг реабилитация жараёнини ўтаётган ҳужумчи 20 апрель куни Италияга қайтиши ва Антонио Конте билан учрашиши керак. Ушбу суҳбатда футболчининг «Наполи»даги келажаги ҳал бўлади. Клуб уни асосий жамоа таркибидан бутунлай четлатиш имкониятини кўриб чиқмоқда. Бу чора «Наполи»нинг кенгроқ стратегияси бир қисми бўлиб, клуб шартнома муддати тугашига бир йил қолганда футболчи билан хайрлашиш ниятида.

Эслатиб ўтамиз, аввалроқ бельгиялик форвард терма жамоа ихтиёрини тарк этиб, шахсий мураббийи билан алоҳида дастур асосида машғулотларни бошлагани хабар қилинган эди. Бу вазият «Наполи» раҳбариятини, хусусан, президент Аурелио Де Лаурентис ва спорт директори Жованни Маннани жуда ғазаблантирган. Улар томонидан қўйилган ултиматум эса жавобсиз қолган.

Жорий мавсумда Лукаку «Наполи» сафида барча турнирларда атиги 7 та ўйинда иштирок этиб, битта гол урди. Ҳужумчи ёзда олган жароҳати сабабли мавсумнинг катта қисмини ўтказиб юборди. Кўриниб турибдики, Конте ва Лукаку ўртасидаги илгариги яқин муносабатлар ҳам вазиятни қутқариб қола олмаяпти.