Мюнхеннинг «Бавария» клуби «Байер Леверкузен»нинг 19 ёшли ҳужумчиси Кристиан Кофанега қизиқиш билдирмоқда. Бу ҳақда ESPN нашри таниқли инсайдер Кристиан Фалькка таяниб хабар берди.

Манбанинг таъкидлашича, «Бавария» раҳбарияти ёзда Харри Кейнга муносиб ўринбосар бўла оладиган ва у билан рақобатлашадиган ёш ҳужумчи сотиб олмоқчи. Мюнхенликлар ҳозирда жамоада ижара асосида тўп тепаётган Николас Жексон билан ҳамкорликни давом эттирмасликка қарор қилишган у ёзда «Челси»га қайтади.

Бироқ, Кофане учун курашда «Бавария» жиддий рақобатга дуч келиши мумкин. Хусусан, Лондоннинг «Арсенал» клуби ҳам футболчи учун расмий таклиф тайёрламоқда. Кристиан Фалькнинг сўзларига кўра, агар «тўпчилар» музокараларга жиддий киришса, «Бавария» молиявий жиҳатдан қийналиб қолиши мумкин.