Айни дамда «Ковентри» бош мураббийи лавозимида ишлаётган англиялик мутахассис Фрэнк Лэмпард Премьер-лига клубларидан бирида иш бошлаши мумкин. Бу ҳақда Британия журналистлари хабар бермоқда.
Мураббийни ўз сафига қўшиб олишга «Борнмут» клуби қизиқиш билдирмоқда. Жамоанинг амалдаги устози Андони Ираола жорий мавсум якунлангач, клубни тарк этади.
Англия чемпионатининг 32 туридан сўнг «олчалар» 45 очко жамғариб, турнир жадвалининг 11-поғонасида боришмоқда. Сўнгги учрашувда «Борнмут» сафарда кутилмаганда Лондоннинг «Арсенал» жамоасини 2:1 ҳисобида мағлуб этди.
Лэмпард бошчилигидаги «Ковентри» эса Чемпионшип турнир жадвалида ишонч билан пешқадамлик қилмоқда.
