«Барселона» Чемпионлар лигасининг ярим финалига чиқа олмади. «Атлетико»га қарши кечган жавоб учрашувида каталонияликлар сафарда 2:1 ҳисобида ғалаба қозонишди, бироқ бу кейинги босқич учун кифоя қилмади. Икки ўйин натижасига кўра «матрасчилар» 3:2 ҳисобида зафар қучишди.

Ўйиндан сўнг майдонга Рафинья тушиб келди. «Барселона»нинг бразилиялик футболчиси жароҳати сабабли ўйинда иштирок эта олмаган бўлса-да, жамоаси билан бирга эди. Рафинья «Атлетико» мухлисларига қарата бир нечта ишоралар (жестлар) кўрсатди. Бразилиялик футболчи айнан нимани ифодаламоқчи бўлганини 100 фоиз аниқлик билан айтиш қийин. Катта эҳтимол билан, Рафинья «Атлетико» ярим финалдаёқ мусобақадан чиқиб кетиши ҳақидаги ўз прогнозини етказмоқчи бўлган. Ушбу видео остидаги изоҳларда айнан шундай тахминлар пайдо бўлди ва футболчининг ишоралари ҳам бунга мос келади.

Чемпионлар лигаси ярим финалида «Атлетико» ё «Арсенал», ёки «Спортинг» жамоасига қарши баҳс олиб боради.