«Barselona» Chempionlar ligasining yarim finaliga chiqa olmadi. «Atletiko»ga qarshi kechgan javob uchrashuvida kataloniyaliklar safarda 2:1 hisobida g‘alaba qozonishdi, biroq bu keyingi bosqich uchun kifoya qilmadi. Ikki o‘yin natijasiga ko‘ra «matraschilar» 3:2 hisobida zafar quchishdi.
O‘yindan so‘ng maydonga Rafinya tushib keldi. «Barselona»ning braziliyalik futbolchisi jarohati sababli o‘yinda ishtirok eta olmagan bo‘lsa-da, jamoasi bilan birga edi. Rafinya «Atletiko» muxlislariga qarata bir nechta ishoralar (jestlar) ko‘rsatdi. Braziliyalik futbolchi aynan nimani ifodalamoqchi bo‘lganini 100 foiz aniqlik bilan aytish qiyin. Katta ehtimol bilan, Rafinya «Atletiko» yarim finaldayoq musobaqadan chiqib ketishi haqidagi o‘z prognozini yetkazmoqchi bo‘lgan. Ushbu video ostidagi izohlarda aynan shunday taxminlar paydo bo‘ldi va futbolchining ishoralari ham bunga mos keladi.
Chempionlar ligasi yarim finalida «Atletiko» yo «Arsenal», yoki «Sporting» jamoasiga qarshi bahs olib boradi.
