Лондоннинг «Арсенал» клуби ярим ҳимоячиси Деклан Райс Чемпионлар Лигаси 1/4 финали жавоб баҳсида Лиссабоннинг «Спортинг» жамоаси билан қайд этилган уйдаги дурангдан (0:0) сўнг ўз фикрларини билдирди. «Канонирлар» икки ўйин натижасига кўра (1:0) ғалаба қозониб, Европанинг энг нуфузли клублар турнири ярим финалига йўл олишди.
«Мен ҳаяжондаман. Жуда ҳам бахтлиман. Энди биз ўтган мавсумдаги натижамизга нисбатан яна бир қадам олдинга ташлаб, финалга чиқишни истаймиз. Ҳафсала пир бўлиши? Йўқ. Биз яна ярим финалдамиз. Одамлар нима деб ўйлаши бизни қизиқтирмайди», — деди Райс TNT Sports нашрига.
Чемпионлар Лигаси ярим финалида «Арсенал» Мадриднинг «Атлетико» жамоасига қарши баҳс олиб боради. Биринчи учрашув апрель ойининг охирида бўлиб ўтиши режалаштирилган.
