Лондоннинг «Арсенал» клуби дарвозабони Давид Райя навбатдаги бор жамоасининг Чемпионлар лигасидаги дарвозаси дахлсизлигини сақлаб қолишга ёрдам берди.
Чоршанба куни «канонирлар» ўз майдонида Лиссабоннинг «Спортинг» жамоаси билан 0:0 ҳисобида дуранг ўйнаб, ярим финалга йўл олди. Биринчи учрашувда ҳам лондонликлар гол ўтказиб юбормаган эди — 1:0. Шу тариқа, Райя ҳисобидаги ЕЧЛ жорий мавсумидаги «қуруқ» ўйинлар сони 8 тага етди ва бу клуб рекордининг такрорланишидир. Бунгача ягона рекордчи Йенс Леманн ҳисобланарди — у 2005/06 йилги мавсумда 8 та баҳсда дарвозаси дахлсизлигини сақлаган. Таъкидлаш жоизки, ўшанда, бундан 20 йил аввал, «Арсенал» финалгача етиб бориб, «Барселона»га имкониятни бой берганди (1:2).
Бу сафар «тўпчилар» финал йўлланмаси учун Мадриднинг «Атлетико» клуби билан баҳслашади. Яна битта «қуруқ» ўйин Давид Райяни мутлақ рекордчига айлантиради.
