Миланнинг «Интер» клуби президенти Жузеппе Маротта Кристиан Киву келаси мавсумда ҳам жамоани бошқариши ёки йўқлиги ҳақидаги саволга жавоб берди.

«Киву, албатта, қолади. У биз билан бирга бўлади. У Европадаги энг яхши истиқболли мураббийлардан биридир», — дея функционернинг сўзларини келтиради журналист Фабрицио Романо.

Журналистнинг таъкидлашича, айни дамда клуб раҳбарияти Киву билан янги шартнома бўйича фаол музокаралар олиб бормоқда.

45 ёшли руминиялик мутахассис ўтган ёзда «Интер» бошқарувини қўлга олган ва икки мавсумга мўлжалланган меҳнат шартномасини имзолаган эди.

32 турдан сўнг «нерадзурри» 75 очко жамғарган ҳолда Италия чемпионатида пешқадамлик қилмоқда.