«Манчестер Сити»нинг португалиялик футболчиси Бернарду Силва «шаҳарликлар» сафидаги сўнгги мавсумини ўтказаётганини тасдиқлади.

— Мен бу клубга кичкина болакайнинг орзулари билан келгандим. Бу шаҳар ва бу клуб менга кутганимдан ҳам кўпроғини берди. Бир неча ойдан сўнг, нафақат кўплаб ғалабаларга эришган, балки оиламни қуриб, турмуш қурган шаҳрим билан хайрлашиш вақти келади, — деди Бернарду.

Ярим ҳимоячи алоҳида тарзда жамоа мухлисларига, клуб раҳбариятига, шерикларига ва бош мураббий Хосеп Гвардиолага миннатдорчилик билдирди.

Бернарду 2017 йилдан бери инглиз жамоаси шарафини ҳимоя қилиб келмоқда. У умумий ҳисобда 451 та ўйин ўтказиб, 76 та гол урди ва шерикларига 77 та голли узатмани амалга оширди.