«Manchester Siti»ning portugaliyalik futbolchisi Bernardu Silva «shaharliklar» safidagi so‘nggi mavsumini o‘tkazayotganini tasdiqladi.

— Men bu klubga kichkina bolakayning orzulari bilan kelgandim. Bu shahar va bu klub menga kutganimdan ham ko‘prog‘ini berdi. Bir necha oydan so‘ng, nafaqat ko‘plab g‘alabalarga erishgan, balki oilamni qurib, turmush qurgan shahrim bilan xayrlashish vaqti keladi, — dedi Bernardu.

Yarim himoyachi alohida tarzda jamoa muxlislariga, klub rahbariyatiga, sheriklariga va bosh murabbiy Xosep Gvardiolaga minnatdorchilik bildirdi.

Bernardu 2017 yildan beri ingliz jamoasi sharafini himoya qilib kelmoqda. U umumiy hisobda 451 ta o‘yin o‘tkazib, 76 ta gol urdi va sheriklariga 77 ta golli uzatmani amalga oshirdi.